„Hobts as scho gheat?

Na, woastscho, des vom Metzger-Schorsch vo Oiddorf drom? Na, ea hod allewei gwuascht und a guads Schweinas gseicht, sei Lebn long; un hod an jedn Sonndog noch da Mess‘n, un nochdem ea ba da Fedrizzi-Anni sei Hoibe Franziskaner g‘friaschobbt hod, an seina Rennmaschin umanandgmankejt. De Maschin hod ea vo seim Voda g‘erbt, z’samm mim Lon, mim Hof, und mid de Fiacha. S‘Lebn wead eam eppan faad gwoan sei. Warad ea sonst davog’rost wiara g’sengte Sau?

Mei, ea woar jo aa scho beinah sexasiebazg, wiera se noch da Messn denkt hod – naa, g’sogt hod as, zua Fedrizzi-Anni. Fedrizzi-Anni, hod a g’sogt, heid bringst maramoi a Hoibe Dunkejs, hod ea gsogt. D‘Anni muas se denkt hom, mei spinnt dea, dea Metzger-Schorsch, dea hod jo no nia koa Dunkels ned drunga. Aba wenn ea moant.

Un I moan es muas beim Dringa vo dera Hoibn Dunkejn mim Kini auf da Floschn gwen sei, dass se dea Metzga-Schorsch denkt hod: Kreizkruzifix, de Beag un de Baam: De san ma jetzat scho leidig faad.
Un naa is Metzga-Schorsch in sei Schei zu eam seina Renn-Maschin glaffa, hods mid aneram Moads-Groch – wia ma‘n in Oiddorf seiddem nimma gheat hod – ogschmiss‘n und is aaf da Doafstrossn davog’rauscht, dass‘d da Sau graust.

Un naa hod ma nix mea vo eam gheat, bis nachad noch zwoa Dog, an dena im Post-Hof un bä da Oid Sennerin drom vo nix andas fazejt woan is wia vom Schorsch. Do hom de Hundsgrippejn vo de Greana ogruaff’n beim Herrn Gemeinderat Wimmer, und hom eam gsogt, dass da Schorsch dod is. Ea hed se bei Klein Waddewarden, kuaz voa da Noadsee, mid da Maschin um den oanzign Baam rummagwickejt, den‘s weid und breid gebn hod. Schnej is a gwen mid da Rennmaschin, direkt dabaazt hods eam an dem Baam.

Des hed i ma ned dengt: Dos da Metzger-Schorsch a so a wuida Hund is. Aba bleed woara aa, dea Hundsgrippej: Do foad oana mid da Rennmaschin vo Oiddorf an‘d Noadsee, wei eam de Beag un de Baam nimma g’frein, und nochad dabaazd a se am letzdn Baam vor Wangerooge.

Reschpekt! Abara Depp is ea scho gwen, da Schorsch.“